Ўзбекистонда мобил қурилмаларнинг IMEI кодини қонунга хилоф равишда ўзгартириш ёки нусхалаш учун маъмурий жавобгарлик белгиланди.
Бунда қоидани бузганларга жарима солинишидан ташқари, жиноят содир этишда фойдаланилган ашё мусодара қилинади.
Ўзбекистонда Маъмурий жавобгарлик тўғрисидаги кодексга мобил қурилмаларнинг IMEI кодини қонунга хилоф равишда ўзгартирганлик ёки нусхалаш учун жавобгарликни назарда тутувчи 155−3-модда киритилди.
19 январь куни Шавкат Мирзиёев мазкур ўзгартириш бўйича қонунни имзолади. У ўтган йилнинг 19 сентябрь куни Олий Мажлис Қонунчилик палатаси томонидан қабул қилинган ва 24 ноябрда Сенат томонидан маъқулланганди.
Янги моддага кўра, мобил қурилманинг халқаро ягона идентификация кодини унинг қонуний ишлаб чиқарувчисининг рухсатисиз ўзгартириш, шунингдек, махсус дастурларни ишлаб чиқиш, тарқатиш ёки улардан шу мақсадда фойдаланиш БҲМнинг 15−20 бараваригача миқдорда жарима (5,1 млн сўмдан 6,8 млн сўмгача) солишга сабаб бўлади.
Абонент қурилмасининг идентификация модулини унинг қонуний ишлаб чиқарувчиси ёки қонуний эгасининг рухсатисиз ўзгартириш ёки унинг нусхасини яратганлик учун БҲМнинг 20 бараваригача жарима (6 млн 800 минг сўм) солинади. Иккала ҳолатда ҳам жиноят содир этишда фойдаланилган қурол мусодара қилинади.
Ўзгартиш тўғрисидаги қонунда қайд этилишича, ахборот-коммуникация технологияларининг ривожланиши ва рақамли технологиялардан фойдаланган ҳолда содир этилаётган жиноятларнинг янги турларининг пайдо бўлиши фуқароларнинг ҳуқуқ ва қонуний манфаатларини ҳимоя қилиш, давлатга етказиладиган зарарнинг олдини олишга қаратилган қарорлар қабул қилишни талаб қилади.
Кодексга киритилган ўзгартириш уч ойдан сўнг кучга киради.
Манба